B Quill

قعدت خمس دقايق عند بياع فاكهة بحاول أفهم هل البرتقال بصرة ده معناه إنه كله شبه بعضه، و هل اللي هيشتري كيلو هيقش الباقي؟، لحد ماتفتق ذهني ان المقصود بسرّة. * النهاردة حلقت لنفسي في البيت و دي كانت أحلى حلاقة حلقتها في حياتي. القرار ده إتأخر سنين و لهذا السبب بصب لعناتي على وليد كل ما حلقت شعري حتى لو مش عنده..

  مطر.. كأن الله أخيرًا إنفجر في نوبة عياط على كل البشر اللي خذلهم السنة دي، كل الإيدين اللي مرفوعة للسما بتدعي أملها موتة سريعة و جنازة تصون كرامة جسدها. * بالنسبة لي أندرو تيت مايختلفش عن عاملات الجنس في only fans كلهم بيستغلوا سوق الرجالة الوحيدة المتزايد مؤخرا كديموجرافية تجارية مش أكتر، مش ديموجرافية تستحق الإهتمام و حل مشاكلها.

 في الفترة دي من كل سنة بيكتر الكلام عن أصل الكريسماس هل هو مصري، مسيحي، أو وثني، الحقيقة بالنسبة لي الكريسماس عمره ماكان عيد ديني  عمره ماكان عن ميلاد إله أو شجرة قد ماكان عن إعادة ولادة البهجة، و التغلب على كل الشرور اللي جلبتها السنة المنصرمة، و عن تجديد روح الحب للحياة في الإنسان عشان يرحب بسنة جديدة، و يصلح كل الصدوع الغافية في روحه قبل ما تصحى في السنة الجديدة.

  طبقًا للبوذية الكارما هي مجموع تصرفاتك و إختياراتك في حيوات سابقة، و بتأثر على مستواك، شكلك، و نوعك و سهولة حياتك الجديدة. و طبقًا لآخر مرّة بصيت في مراية أكيد كنت وغد مافيش أم منه في حياتي اللي فاتت.

  دايما بأقرا مصطلح "أحس بدنو أجله" و رغم كونها فكرة ملهمة رغم إنه إتقال لنا دايما إن  ماحدش عارف هيموت إمتى. بس لازلت تقدر تحس بقربه لما يكون قريب كفاية. رغبة غريبة جوايا أسأل واحد بمرض عضال أو على فراش الموت: "هل إنت حاسس بيه؟"،  "هل هو بارد و وحيد؟" "هل حقيقي بتحس بدفا معرفة إن حبايبك في الآخرة مستنيينك؟". "هل بتوجع؟"، هل خايف تعيّط، و إنت عارف إن دي الحاجة اللي الناس هتفتكرك بيها رغم إنك نفسك تعيط قوي؟.

  قطتين صغييرين بدءوا يلعبوا معايا، لاعبتهم و إديتهم حتة أكل من اللي معايا، ماعداش وقت و كلب من غير ما أحس جه من ورايا و نط على رجلي اليمين عشان يلفت إنتباهي، لقيت عصاية صغيرة رميتها له يجي ١٠ متر كده راح جري و جابها.. ولد شاطر!. ممكن يكون في سبب إن الحيوانات بتحبني و البشر لأ، جايز الحيوانات مش حكّام جيدين على الشخصيات زي ما بيقولوا.