B Quill

  تصالح مع كونك السيء في قصة أحدهم. حتى لو ماكنتش. ماتنساش إن الناس هتحوّلك لاي حاجة عشان روايتهم تبقى منطقية قصاد نفسهم، فبطّل تحاول. * قمة التطور الحيوي هو إننا نوصل لكائن واعي لحقيقة الموت و إنعدام الماهية، و مدرك لمسؤوليته عن إيقاف السعي الحثيث للبقاء. و لكننا لسبب ما بنولد أجيال جديدة تعيش نفس الحقيقة و نفس العاناة و توصل لنفس الإدراك، و نضغط عليهم مجتمعيا يستمروا في نفس الدايرة في محاولة مثيرة للشفقة لملامسة الخلود.

 أنا تعب و زهقت من كل الناس اللي بيخرجوني برّة حياتهم، تعبت من الجهد اللي ببذله عشان علاقات محكومة بالموت. من كل الحاجات اللي بحطها على الترابيزة و تترمي في وشي و يتقلل من قيمتها و قيمتي لمجرد بس أفضل في علاقة. أنا أهم و أقيم من كل ده. بسبب ده كله المكان اللي بين ودني حي سيء، المفروض الواحد يهرب منه، بس فين؟، و لمين؟ أنا وحيد و تعبت من إني ألوم نفسي على الموضوع ده !

أنا المفقود من الزمن، النائم في أحضان التاريخ يلتقم الخدر من نهد الحلم. أنا الحقيقة المنفردة في كون يهيم بالخيال، و الضجر يفقده مذاقه الأمثل، و هنا متفرد..أزلي التوحد. * موود الشتاء و الحاجة للدفء الداخلي، و هو موود كاظمي بإمتياز.

لا فضيلة لمن لا يرون أنهم مذنبون إلا عندما ينكشف أمرهم، بل رذيلة مضاعفة، رذيلة المشين، و رذيلة التنطع تظاهرا بالعفاف. * أحيانا بتفتكر إنك بتحب، بينما إنت متغطي بألمك و غرقان فيه، و مشاعرك هي مجرد قشة وهمية بتحسسك إنك هتنجوا في يوم..الألم خدرك و الحب أسكرك و النهاية صدمة فراق كلطمة بميولنير -مطرقة ثور - على وشك.

الجسد بيسبق الروح - في العادي - إلى خط النهاية، و تفضل الروح مش مصدقة إنها رغم إنها يافعة لكن قشرتها بتشيخ و بتقود مرورها الغير المحكوم للعالم الآخر. عشان كده كنت دايما مهتم بإني أحافظ على شباب الروح، و ده بيتطلب تطنيش و تجاهل مؤثرات كتير جدا، و على غير المتوقع بيتطلب برضه سعي كتير جدا. ينكمش جلد الخد من الإبتسامة و تفضل الروح غضة، خلي ده محفزك لإنك ماتستسلمش، لإنك مش محتاج تحفيز عشان تعمل حاجة، إنت كل ما تحتاجة تذكير عابر بإنك ماتستسلمش.

الهوا البارد بيدخل من مسام راسي منعدمة الشعر بيجمد دماغي و خلايايا العصبية زي نهر من الجليد بيمشي جواها. ده العيب اللي ماحدش من محبين الستايل ده قال لنا عليه.

"الانسان حيوان تمكن من تسجيل تاريخه" الأفكار الألمعية بتيجي للإنسان في أغرب الأوقات. الحمام..و هو راكب الباص.. أو و هو بيتمشى بعد منتصف الليل في شارع هادي بينوره عامود وحيد، و المحلات المقفولة حاضنة بعضها عشان تتدفى، و السما بينورها قمر خجول من ورا سحاب، لوّن الوجود بزرقه كإنها نزيف الملايكة. بما إننا رصدنا حيوانات بتمارس ما يشبه الطقوس الدينية. زي الشمبانزي و الفيلة، فممكن قريب هنضطر نعيد التفكير في هذا التعريف .

للأسف حاولت من أول اليوم ألاقي وصف مهذب أو خالي من التجريح لمن يقرر تصديق التصريحات الإسرائيلية عن إن مصر هي اللي مش بتسمح للمساعدات توصل لغزة، رغم إنه المعبر تم ضربه ٤ مرات على مرأى و مسمع الكل. لكني لم أجد. في النهاية قلت لنفسي :"ليه أرهق نفسي لإحترام شخص هو نفسه لم يحترم نفسه و قرر يصدق طرف بيكذبه من ٧٠ سنة؟"، كل واحد له الحق في رأيه في النهاية.

أعتقد أكبر خيبات الأمل اللي ممكن تتعرض لها في رحلة نضوجك هو إدراكك المفاجيء إن السعادة مش شيء مستمر أبدي، السعادة جرعات لازم تتعب نفسك عشان تعمل حاجات تديك جرعات منها، و الأدهى إنك لازم تجدد التصرف اللي بيزود الدفعات و إلا التصرفات دي نفسها هتكون سبب إكتئابك.

الإنتصارات اللي حلمت سنين و إتدربت عليها في خيالي مالهاش قيمة، كل هزيمة سيبتها لبرد الأيام يغطيها و يهزمها السكوت و التناسي ماتت و شبعت موت، و تارها مالوش طعم و ماعالجش جرحها. "كان أولى ردي يدق الحديد سخن" ايه قيمة الانتصار قدام اللي انهكته الأيام و أضعفه الزمن؟، و إكتسب عِند العجزة..أنا دلوقتي ماليني ندم الحكيم اللي ما إستغلش رعونة الصبا.

الإختلاف مش رحمة. أوروبا قضت  ٣٠   سنة و مات فيها  ١٢   مليون بني أدم بسبب خلافهم على طبيعة تضحية المسيح على الصليب و هل هي كفاية لفداء الإنسان ولّا لأ، و هل لو لأ ده يعتبر تقليل من تضحية الرب؟، و تحولت الحرب بعدها لصراع سياسي ثم صراع استعماري. الوحدة البشرية حلم رومانطيقي، لكنه كابوس بيطمس فَرَدَانية الإنسان، إن توحيد التنوع البشري معضلة لا حل لها.

اذا كانت كل الميثولوجيا من صنع الانسان، و القيمة هي مفهوم يختص به الدماغ البشري، فكل شيء له سعر، و ده بيشمل كل شيء، حتى الرب، و هتتفاجئوا إنه السعر مش لانهائي.

قعدت خمس دقايق عند بياع فاكهة بحاول أفهم هل البرتقال بصرة ده معناه إنه كله شبه بعضه، و هل اللي هيشتري كيلو هيقش الباقي؟، لحد ماتفتق ذهني ان المقصود بسرّة. * النهاردة حلقت لنفسي في البيت و دي كانت أحلى حلاقة حلقتها في حياتي. القرار ده إتأخر سنين و لهذا السبب بصب لعناتي على وليد كل ما حلقت شعري حتى لو مش عنده..

  مطر.. كأن الله أخيرًا إنفجر في نوبة عياط على كل البشر اللي خذلهم السنة دي، كل الإيدين اللي مرفوعة للسما بتدعي أملها موتة سريعة و جنازة تصون كرامة جسدها. * بالنسبة لي أندرو تيت مايختلفش عن عاملات الجنس في only fans كلهم بيستغلوا سوق الرجالة الوحيدة المتزايد مؤخرا كديموجرافية تجارية مش أكتر، مش ديموجرافية تستحق الإهتمام و حل مشاكلها.

 في الفترة دي من كل سنة بيكتر الكلام عن أصل الكريسماس هل هو مصري، مسيحي، أو وثني، الحقيقة بالنسبة لي الكريسماس عمره ماكان عيد ديني  عمره ماكان عن ميلاد إله أو شجرة قد ماكان عن إعادة ولادة البهجة، و التغلب على كل الشرور اللي جلبتها السنة المنصرمة، و عن تجديد روح الحب للحياة في الإنسان عشان يرحب بسنة جديدة، و يصلح كل الصدوع الغافية في روحه قبل ما تصحى في السنة الجديدة.

  طبقًا للبوذية الكارما هي مجموع تصرفاتك و إختياراتك في حيوات سابقة، و بتأثر على مستواك، شكلك، و نوعك و سهولة حياتك الجديدة. و طبقًا لآخر مرّة بصيت في مراية أكيد كنت وغد مافيش أم منه في حياتي اللي فاتت.

  دايما بأقرا مصطلح "أحس بدنو أجله" و رغم كونها فكرة ملهمة رغم إنه إتقال لنا دايما إن  ماحدش عارف هيموت إمتى. بس لازلت تقدر تحس بقربه لما يكون قريب كفاية. رغبة غريبة جوايا أسأل واحد بمرض عضال أو على فراش الموت: "هل إنت حاسس بيه؟"،  "هل هو بارد و وحيد؟" "هل حقيقي بتحس بدفا معرفة إن حبايبك في الآخرة مستنيينك؟". "هل بتوجع؟"، هل خايف تعيّط، و إنت عارف إن دي الحاجة اللي الناس هتفتكرك بيها رغم إنك نفسك تعيط قوي؟.

  قطتين صغييرين بدءوا يلعبوا معايا، لاعبتهم و إديتهم حتة أكل من اللي معايا، ماعداش وقت و كلب من غير ما أحس جه من ورايا و نط على رجلي اليمين عشان يلفت إنتباهي، لقيت عصاية صغيرة رميتها له يجي ١٠ متر كده راح جري و جابها.. ولد شاطر!. ممكن يكون في سبب إن الحيوانات بتحبني و البشر لأ، جايز الحيوانات مش حكّام جيدين على الشخصيات زي ما بيقولوا.

  -1-     قضيت نص عمري خايف من اللي بعد الموت، و بعد حادثة كبيرة و تجربة إقتراب منه، عشت باقي عمري خايف من إزاي هموت. خلينا نتفق مع بعض من الأوّل. خوفنا كبشر من الموت خوف فطري، واحدة من أكبر الأفكار المؤثرة في تاريخنا إن لم تكن الأكثر تأثيرًا و هي الدين، إتولد من خوفنا من الموت و من جهلنا باللي هيحصل بعده و إستصعابنا لفكرة العدم و إننا بذواتنا المتضخمة و غرورنا البشري الفطري هننطفي زي شمعة. الموضوع بسيط، كل اللي عليك تفكر فيه هو كان في وعيك قبل ماتتولد؟، لو حسيت بمرارة في بؤك و خذلان وضعف، مبروك إنت كده فهمت الحقيقة، و الأحسن إنك تفهم ده في فترة مبكرة من حياتك، عشان تمر بمرحلة العدمية و العبث و "كل حاجة مالهاش معنى" و تفرغ كل الهرمونات المراهقة دي في السن اللي ممكن الناس تتقبل نسبيا حدوث التصرفات دي فيه. لا أحد يحب المتذمر الكبير. الموت - كحدث دائم- مش مخيف، الطريقة اللي هتموت بيها تفكيرك فيها مرعب، لكن حتى الخاطرة دي تقدر تسيطر عليها بتسليمك إنك محدود القدرة، و العالم عشوائي جدًا و مش هتقدر تسيطر على كل حاجة فيه، فكرة محزنة في البداية لكن كلما إختمرت في مخك كلما نَض...

  اعتقد ان رغم تفوق العرب في العلوم التجريبية بشهادة المؤرخين، إلا إنهم إفتقروا جدا للإجتهاد في العلوم النظرية، خصوصا الفلسفة. بعض المؤرخين بيتكلموا عن صراع الحكام و رجال الدين مع المدارس الفلسفية اللي بتظهر، و تفضيل الحكام لعزلهم مؤقتا عشان مايسببوش قلاقل في الدولة، و يسحبوا سجادة الحكم من تحت رجليهم، و ده بيديك فكرة بسيطة عن نظام الخلافة الشمولي و طريقة تفكيره.     و بكده التطور الفلسفي لم يخرج من المهاترات الدينية، و حتى اللي كان بيخرج عن النسق العام بيتم تتفيهه و تسفيهه،  و كان من الطبيعي إن الاغريق و الرومان اللي سبقوا العرب في فلسفاتهم انهم يسبقوا في المفاهيم الانسانية زي الحقوق و الاخلاق و حتى الدين عندهم له مفاهيم اعقد نسبيا من الاسلام، و ده سبب واحدة من اكبر المعضلات في تاريخ المواجهات الدينية، فكرة الوحي و هل هو مرسول نصّي أم إلهام في قلب الرسل؟.  هتلاقي اليهودية و المسيحية بتسمي الوحي الالهي إلهام من الروح القدس، اللي هي روح الله الماثلة في كل البشر، يعني الموضوع إيحاء مش نص بإستثناءات بسيطة جدًا زي الوصايا العشر لموسى، و ده سهّل عملية تهذيب المش...